انا جاي النهارده عشان اقولكم ازاى تناموا بسرعه
في ناس سورى في اللفظ نومها ي ساتر يارب يخنق .. وانا مجرب بينى وبينكم
لما تلاقوا حد جمبك عمال يفرك في السرير ومش عارف ينام .. مش حينيمك ... وانا بقول لكل واحد وقع في الموقف ده احب اقوله انا اكتر واحد حاس بيك ... عشان كده انا قولت اقولكم واجيبلكم الموضوع ده ( ازاى لما تخش تنام وتحط دماغك على المخده ترووووووووووووووح في النوم على طول )

نخش في المفيد ... لما تحب تنام وتروح في النوم على طول لازم تعمل كذا حاجه حقولهم دلوقتى حالا ومش عايز حد يقاطعنى في الليله اللى مش معديه ديه عشان اخلص لانى ورايا مشاوير ومواضيع تانيه

اول حاجه حتعملها انك تخش الحمام تعمل زى الناس وتتوضا ... اهم حاجه انك تتوضا .. متقولش مش مهم وتطلع .. وبعدين متكبرش وتقول انا صليت العشا مفيش داعى للوضوء .. واللى مبيصليش يصلي
عشان عيب اوى تتوضا للنوم والصلاه ولا بتيجي جمبها
حيجيلك نوم منين بالذمه ... فلازم تتوضا



تانى حاجه عشان انت متوضي لازم تصلي الشفع والوتر ... يعنى لازم تكون مصلي العشا زى ما قولنا .. وعشان تبقي مصلي العشا لازم تكون صليت المغرب وهكذا لغايه الفجر وعشان تكون صليت الفجر لازم تكون صليت الصلاوات الخمس بتوع امبارح ...... يوووووووووو مش هنخلص ... كل ده عشان تناملك سعتين ..
المهم في الاخر تكون اتوضيت وصليت الشفع والوتر



تالت حاجه .. تقول اذكار النوم ( دعاء قبل النوم يعنى ) يا ريت متكسلش لان فضل الدعاء ده جامد
حتقولى مش حافظه اقولك كتب الاذكار موجوده في كل حته ولا فالح بس تنزل لعلبه السجاير تجيبها من اخر الدنيا



رابع حاجه .. وهى حاجه لازم تعملها كويس اوى وبدقه وهى عمليه التنفس
لازم يكون التنفس بطيء .. تملى صدرك بالهوا وطلع النفس من بوقك كانك بتطفي شمعه .. اعمل الموضوع ده 20 او 30 مره وحتحس بعد كده بحاجات غريبه في دماغك ( احتمال تتخيل حاجات كده اللهم احفظنا ) .. متقلقش محدش حيحس بالحاجات دى غيرك



خامس حاجه ... الاسترخاء ... ومحدش يسالنى يعنى ايه لانى اساسا مش فاهم اى حاجه من اللى انا بقولها ... حاول تحس بالبتاعه دى اللى اسمها ... اه الاسترخاء .. اعصابك كلها هاديه وعضلاتك مسترخيه وجسمك كله يا ريت تبقي مش حاسس بيه .. حاول تركز في صوت نفسك اللى داخل واللى طالع



سادس حاجه .. حاول تكلم نفسك وانت نايم كده وانت في الحاله وقول بصوت خافت جدا وبمنتهى الهدوء ( ناااااااااااااااام .. ناااااااااااااااااام ... الخ )وربنا ما بهزر .. انا مش جايبه الموضوع من اخر الدنيا وتاعبه
نفسي وطالعه عينى عشان تضحك وتمشى .. والله اسيبلكم المنتدى كله وامشي .. حتعمل زى ما بقولك كده ( نااااااااااااااااااام نااااااااااااااااااااام ) .. يعنى بتاع اربعين خمسين مره لحد ما تحس انك اتهبلت .. قصدى تحس ان النوم كبس على نفسك



معلومه صغيره بقي عشان الحبايب اللى قاعده معانا وواخده الموضوع بجد شويه ..
ممكن حضرتك تقوم في الوقت اللى انت عايزه من غير اى حاجه تصحيك
يعنى ممكن تبقي منبه لنفسك او ساعه ستوب ووتش . بتكلم بجد .. تصدقوا انا غلطان .. لما نشوف اخرتها
واحد اهه سئل وقال ازاى ..كويس انه سئل السؤال ده لانى كنت حموت و اسال نفس السؤال

اه افتكرت .. اليكم التفسير العلمي وعلى الله حد يضحك ..

(( لو شخص خاطب نفسه ان تقوم الساعة الثالثة والنصف ليلاً ان شالله سيقوم لانه خاطب العقل اللاوعي ( الباطن ) وهو سيكون بمثابة منبه ويمكن تحديد اي وقت للاستيقاظ.. فالعقل الباطن هو الذي سيقوم بالمهمة فما عليك الا ان تخبره ))

من الاخر وعلى بلاطه انك قبل متنام قولت حقوم الساعه تلاته ونص فانت كده ظبط مخك سيادتك انه يقوم لوحده او يقومك .. حاجه من الاتنين مش حتفرق .. ومحدش يسالنى ازاى لانى شخصيا مش عارفه

يا رب تكونوا فهمتوا حاجه من الموضوع ده وانا مكنتش عايز اقول عشان كده
الضحك ده مش مستحب في كلام علمى زى ده
تصدقوا انا غلطان انى تاعب نفسي وعمال اشرح .. انا حروح ابيع عيش احسن ..
يلا عيييييييييييييييييييييش


على فكره يا جماعه الكلام كله صحيح وربنا صحيح وما بضحكش عليكوا والا مكنتش حطيته

دعاء قبل النوم

( بسمك اللهم وضعت جمبي وبك ارفعه فان امسكت روحى فارحمها وان ارسلتها فاحفظها بما حفظت به عبادك الصالحين وانبيائك والمرسلين )يلا وفرت عليكم تمن الكتاب